Sāra Saṅgama 13

ಸಾರ ಸಂಗಮ  by “ತ್ರಿವೇಣಿ ತನಯ”

ಎಲ್ಲ ನಿಶ್ಚಿತ -ಜ್ಞಾನ ಸುರಕ್ಷಿತ

ಅದು ಬೇಕು ಇದು ಬೇಡ ಅನ್ನಲು ನೀನಾರು?

ನಿಶ್ಚಯವಾಗಿಹೋಗಿದೆ ನಿನ್ನ ಪಾತ್ರದ ಕಾರುಬಾರು,

ಅಂಟದೇ ನಿರ್ವಾಹಿಸಿದರೆ ನೀನು ಸುರಕ್ಷಿತ,

ಅಂಟಿಕೊಂಡರೆ ಚಕ್ರಭ್ರಮಣವದು ಖಚಿತ.

ಬಂಧನ -ಚಂದನ

ನಾನು ನನ್ನದೆಂಬುದೇ ಬಲು ದೊಡ್ಡ ಬಂಧನ,

ಬಿಟ್ಟರದನು ಬದುಕಾದೀತು ಘಮಿಸುವ ಚಂದನ,

ವ್ಯಾಪಾರ ನಿನ್ನ ಕೈಯಲಿಲ್ಲ ಸ್ನೇಹದಿ ಪ್ರೀತಿಸುತ್ತ ಬಾಳು,

ಕರೆ ಬಂದಾಗ ನೆಮ್ಮದಿಯಲಿ ಕೈತೊಳೆದು ಏಳು.

ನೀ ಬಿಂಬ -ಜಗ  ಪ್ರತಿ ಬಿಂಬ

ಅವರ್ಹಾಗೆ ಇವರ್ಹೀಗೆ ಅನ್ನೋದ್ಯಾಕೆ ಒಣಜಂಬ,

ಕಾಣುವುದುದದು ಎಲ್ಲರಲು ನಿನ್ನದೇ ಪ್ರತಿಬಿಂಬ,

ನೀ ನಿರ್ಮಲ ನಿರ್ಲಿಪ್ತವಿರೆ ಎಲ್ಲರೂ ಸೊಗಸು,

ಒಳಕೊಳೆಯ ಪ್ರಭಾವವಿರೆ ಎಲ್ಲರೂ ಹೊಲಸು.

ಪರೀಕ್ಷೆ -ಪರಿಹಾರ ಭಿಕ್ಷೆ

ಬದುಕಿನ ತಿರುವುಗಳಲಿ ಪರೀಕ್ಷೆಗಳು ನೂರು,

ಕ್ಷಣ ಕ್ಷಣಕೂ ಪರಿಹರಿಸಿ ದಾರಿತೋರುವ ಅವನಾರು?

ಅವನ ನಂಬಿ ನಡೆವವರಿಗೆ ನೋವಿನ ಲೇಪವಿಲ್ಲ,

ನಿನ್ನ ಪಾಲಿನ ಬುತ್ತಿ ಬಿಚ್ಚಿಡುವ ಬೇವು- ಬೆಲ್ಲ.

ದೃಷ್ಟಿ ನಿನ್ನ ಪಾದದಲ್ಲಿ

ಬದಲಾವಣೆ ಬದುಕಿನ ಅವಿಭಾಜ್ಯ ಅಂಗ,

ಬದಲಿಸದಿರು ಎಂದೆಂದೂ ಸಜ್ಜನರ ಸಂಗ,

ಲೌಕಿಕ ಬದುಕಿನ ತಿರುವುಗಳು ಎಂತೇ ಇರಲಿ,

ನಿನ್ನ ಪಾದದ ಸ್ಮರಣೆಯದು ತಪ್ಪದಿರಲಿ.

(Contributed by Shri Govind Magal)