Bhava Spandana - 4

ಭಾವ ಸ್ಪಂದನ by “ತ್ರಿವೇಣಿ ತನಯ”

ಆವರಣ -ಹೂರಣ

ಪ್ರತಿ ಶಬ್ಧ ಪದ್ಯ ಪುರಾಣ ಇತಿಹಾಸ,

ಅವರವರ ಭಾವಕ್ಕೆ ತೆರೆದುಕೊಳ್ಳೋ ಕೋಶ,

ನಾವು ಗಮನಿಸೋದು ಬರೀ ಹೊರ ಆವರಣ,

ಕಾಣಬಲ್ಲೆವೇ ನಾವು ಅಂತರಂಗದ ಹೂರಣ.

ವೇದ ಉಪನಿಷತ್ತು-ನೈಜ ತಾಕತ್ತು

ಬೇಕೋ ವೇದ ನಾಕು,

ಹತ್ತಕ್ಕೆ -ಏಣಿ ಹಾಕು,

ತಿಳಿ ಹತ್ತು ಉಪನಿಷತ್ತು,

ನಾಕನೇ ಲೋಕಕ್ಕೆ ಹತ್ತು,

ಗಳಿಸಿಕೋ ಬೇಕಾದ ತಾಕತ್ತು,

ಇದೇ ತತ್ವವಾದದ ಗಮ್ಮತ್ತು.

ಬೇಕಿಲ್ಲ ಬಹುಮತ-ಸದ್ಭಾವ ಸಮ್ಮತ

ಮೇರು ಧ್ಯೇಯದ ಕಿರುಸೈನ್ಯ ಗೆಲ್ಲುವುದು ಯುದ್ಧ,

ಪ್ರಾಮಾಣಿಕ ಸಾಧನೆಯು ಸ್ವರ್ಗಾದಿಗಳಿಗೆ ಬದ್ಧ,

ಆಚರಣೆ ಎಂತೇ ಇರಲಿ ಭಾವವದು ಪ್ರಧಾನ,

ಅನಪೇಕ್ಷಿತ ದೈವಾರಾಧನೆಯೇ ಮುಕ್ತಿಗೆ ಸೋಪಾನ.

ಬೇಡ ಜಾತ್ರೆ -ಇದ್ದಲ್ಲೇ ಯಾತ್ರೆ

ವ್ಯಾಕುಲ ಬಿಟ್ಟಿರುವುದೇ ಗೋಕುಲ,

ಚತುರನಾಗಿ ಇರುವುದದೇ ಮಥುರ,

ಪರಿ ಪರಿ ಚಿಂತೆಯ ಬಿಡಲದೇ ಬದರಿ,

ಈ ಪರಿ ಮನವಿತ್ತು ಕಳೆ ಭವದ ಉರಿ.

ಅಂತಃಸತ್ವ -ಮೂಲ ತತ್ವ

ಭಗವಂತಾ ನೀ ಎಲ್ಲಿ ಇಲ್ಲದಿಲ್ಲ,

ಬಲ್ಲವರಿಗೆ ನೀನೇ ಎಲ್ಲರ ಮಲ್ಲ,

ಮತ್ತೆ ಕೆಲವರಿಗೆ ನೀನಾದೆ ಅಲ್ಲಾ ,

ವ್ಯಾಸನಾಗಿ ಬಂದ ನಿನ್ನ ಮೂಲ- ಬೆಸ್ತ,

ನಂತರದ ಕೆಲ ವರ್ಗಕ್ಕಾದೆ -ಏಸುಕ್ರಿಸ್ತ,

ಚೆಂದ ಮನವಿರೆ ಸ್ವಸ್ಥ-ಇರದಿರೆ ಅಸ್ತವ್ಯಸ್ತ.